Нидерландийн юкъараллахь цабезам кхолларна а, нийсонан бакъо йохорна а бехке вина аьттоагIор партин лидер Герт Вилдерс. Кхело гIуда тоьхна цунна аьлла, хаам бина БиБиСи-но.
Вилдерс суьде веллера 2014-чу шарахь Зазадоккху-баттахь, цо Нидерландашкара арабаха беза мелла а алсам Мароккора мухIажираш аьлла, кхайкхам бинчул тIаьхьа. Вилдерса дийцарехь, иза лууш бу дукхахболу хIолландхой.
Вилдерсан парти дакъалоцуш ю 2017-чу шеран Зазадоккхучу-баттахь хир болчу парламентан харжамашкахь.
Нидерландийн социологаша бинчу талламашца, Вилдерсан партехьа а, премьер-министро Рютте Марка куьйгалла дечу Либералан партехьа а цхьатерра кхаж таса дагахь бу харжамхой.
