Инарла-майоран чин делла Нохчийчуьра Хьалха-Мартанан кIоштан куьйгалхо лаьттинчу, "Ахмат" спецназан командиран вешина Алаудинов Iабдуллина, оцу омрана куьгйаздина президенто Путин Владимира.
Алаудинов Аптин жимахволу ваша Хьалха-Мартанан кIоштан куьйгаллехь Iийна дукха хан йалале 2022 шарахь пурстоьпийн Федералан хьукмате дехьа велира. Цул а хьалха Нохчийчохь куьйгалла дира цо цуьнан йалх шарахь, ткъа дахначу шеран дечкен-баттахь Перман махкахь коьрта кхелан пурстоьпан дарже хIоттийра.
Нохчийчохь Алаудинов Iабдулла воьзна вара Хьалха-Мартанан кIоштарчу ГIойтIахь бакъо а йоцуш гIишлош йохорца долчу гIуллакхаца. 2006-чу шарахь меттигерчу бахархошна администрацино латта делира хана лелон, амма цул тIаьхьа исс шо даьлча Алаудинов Iабдуллин омраца цу тIехь йина гIишлош дIайохийра. Латта дIаделира АлаудиновгIеран йишин Асетан цIарца йолчу "Мартан Парк" компанина. Оцу гIуллакхан республикера талламан урхаллин куьйгахочо Волков Виталийс йист цайаккхар чиллан-баттахь кхело бакъойоцуш лаьрра.
Нохчийчоьнан кхелан коьрта пурстоьпан даржехь волчу Алаудиновс цхьаьнатоьхнера "латаран федерацин, юристийн ассоциацин, тIеман-историн а, йукъараллин а, динан таронаш" декхарш тIехь долчу нахаца а, уьш цаьргара схьадохучаьрца а болхбан. И дийцинера цо ша Перман кIоштахь керлачу дарже хIоттийначул тIаьхьа.
- Iабдуллин вешица Алаудинов Аптица дузу Нохчийчуьра "къайлахчу набахтешкахь" нах хьийзор: 2017-чу шеран дечкен-баттахь Кадыров Ахьмадан цIарахчу полкаца вара иза, цигахь иттаннашкахь лецнарш бойуш; цо дакъалаьцна Iедална товш боцчу нехан гергарчарна йетташ; Iадийра меттигера бахархой, кхерамаш туьйсура Нохчийчоьнан урхалхочун дозанал арахьа а, регионехь а бехачу критикашна.
- Оханан-баттахь "Ахмат"спецназан хьалханча волчу Алаудинов Аптина Оьрсийчоьнан тIеман министраллин тIеман-политикан белхахула йолчу урхаллин куьйгалхочун гIовсан дарж делира. Нохчийчоьнан куьйгалхочун Кадыров Рамзанан метта мехкан куьйгалле хIоттон тарлучу нахалахь йоккху цуьнан цIе а.
