Нохчийчоьнан куьйгалхочо Кадыров Рамзана Соьлжа-ГӀаларчу шен резиденцин кертахь гайтира Италин марка йолу Lamborghini трактор. Республикерчу юьртабахаман министраллан коьртехь волчу Кадыровн невцо Мацуев Висхана дӀахьедина, цу компанин коьрта директоро "дина совгIат ду" аьлла. 2022-чу шарахь Евроберто дихкира Оьрсийчу юьртабахаман техника кхачор.
Кадыровс билгал ца даьккхина, билггал муха кхаьчна и техника Нохчийчу – цо цунах "Европера совгӀат" бен ца аьлла, ткъа иза махкарчу юьртбахаман министралле дӀайалар тӀедожийна цо. Оцу йукъанна министралло дӀахьедина, "коьрта директоран Винкельманн Стефанан" цIарах трактор Кадыровга дӀакхачийна Нохчийчуьра юьртбахаман министро Мацуев Висхана аьлла.
Санкцеш кхайкхийна Малхбузера леррина техника гайтаран хан ларамаза хаьржина йац. Хетарехь, и сюжет дӀайазйина Гуьмсера "Оьрсийчоьнан спецназан университетана" дронашца динчу тӀелатарх лаьцна журналисташца къамел динчул тӀаьхьа. Шина а видео тӀехь Кадыровна тӀехь йу "Ахмат" седа тIехь мокха куртка, уьш дӀаязйина Нохчийчоьнан куьйгалхочун резиденцехь.
Оцу кепара Кадыровс баркалла элира хьалхо америкахойн хьоладена Маск Илонна, Нохчийчу кхаьчначу Tesla Cybertruck электромобильна тIехула. ТIаьхьо вукхо харцдира, ша оцу кепара совгIат дар, дIахьедира машенна дистанцихь блок тохарх а.
Иза хилира "Ахматан" дакъошна Курскан кӀоштахь Украинан эскар тIелатар сацо аьтто ца хиларна критика йинчу йукъанна а, ишта тӀаьхьо республикин официалан Ӏедалша нохчашна йукъахь йийсаре лецнарш бац аьлла, официалехь дIахьедарш динчу заманчохь а.
Евроберто дихкира 2022-чу шеран охан-баттахь дуьйна, Оьрсийчоьно Украинехь агресси йар бахьана долуш, йаккхий машенаш а, леррина техника а, шайна юкъахь тракторш а йолуш, цу пачхьалкхе кхачор. Иштта санкцеша доза туьйхира цхьайолу компоненташна импорт йарна а, оцу тIехула Оьрсийчоьнан ахархошкахь къоьлла хIоьттира йолчу паркана оьшу гIирсашца доьзна.
2022-чу шеран гIадужу-баттахь йукъаяьккхинчу Евробертан санкцийн ялхалгӀачу пакето кхин а шордира компоненташ чуйахьаран дехкарш, шайна юкъахь йуьртабахаман техника а йолуш.
Lamborghini компанехь цкъачунна хиллачух лаьцна комментарий йина йац.
- 2022-чу шеран охан-баттахь Украинерчу Мелитополера 1,5 миллион евро мах болу йуьртабахаман техника арайаьккхира Оьрсийчоьнан эскархоша. ТIаьхьо GPS-трекершца иза гучуйелира Соьлжа-ГIалина гена йоццучу Закан-юьртахь. Тракторш а, комбайнаш а латон аьтто ца хилира, царна геннара блок тоьхнера.
- Гуьмсера "Оьрсийчоьнан спецназан университетан" цхьахйолчу гIишлонан тховх цIе йаьллера, гIадужу-беттан 29-чохь дрон кхеттачул тIаьхьа – бохам хиллачу меттигера суьрташ тIехь гуш ду мел лахара а шина меттехь кхерстина цIе. Дукха ца Iаш цIе йайъира, дIахьедира Нохчийчоьнан урхалхочо.
- "Спецназан университетана" тIелетар дале хьалха Росгвардин кир кхоьхьучу машенна а тIелеттера. ГIадужу-беттан 24-чохь Соьлжа-ГIалина уллорчу Петропавловская станицехь муьлш бу цахуучу наха герзаш диттинера Росгвардин коврана. Цхьаъ ницкъахо вийра, шолгIаниг дарбанан цIийнехь кхелхира.